وحشتينى أوى
.. مش عارف أوصفلك قد إيه
وحشتينى
وحشتنى عيونك .. اللى مش قادر اطلعها من دماغى
وحشتنى إيديكى .. وهيا حاضنة إيديا لما كنا بنتمشى سوا
وحشتنى همومك اللى كنت باشتالها .. وانسى همومى
وحشتنى .. نظرتك ليا لما باكون باستناكى .. وألاقيكى جاية من بعيد
وحشتنى ضحكتك .. اللى كنتى بتضحكيها لما اقرالك الأخبار
وحشتنى بسمتك .. لما كدبت عليكى فـ مرة وقلتلك إنى معرفش ليلى
وحشتنى فرحتك .. بالقصايد اللى كنت باكتبهالك
وحشتنى غيرتك .. من اصحابنا ، لما كنت بانقل محاضرة منهم
وحشتنى لهفتك .. يوم ما عملت نفسى باغرق فى راس البر
وحشتنى كل حاجة فيكى
حتى نرفذتك .. لما كنت مابانامش بسبب الكمبيوتر
حتى زعلك منى .. يوم ما قلتلك ماتمشيش مع البنى آدمه اللى اسمها لميا
كل حاجة فيكى وحشتنى
كل حاجة
فاكرة أول مرة أقابلك فيها ؟؟
فاكرة إزاى انا ماكنتش مجمع زى ما قولتيلى ؟؟
اهو انا دلوقتى من غيرك
اكتر من ضايع
ارجوك لو دخلتى - غلطة - على واحد من الناس
ارجوك .. حتى لو نسيتينى تتصلى بيا
حتى لو ماعدتيش بتفكرى فيا
حتى لو قررتى تنسينى
ارجوكى .. اتصلى بس
نفسى أسمع صوتك
نفسى أكلمك .. وتكلمينى
فاكره
قصيدة : اسرار
اللى كل اصحابنا عرفوها
والله أنا اللى كتبتها
عشانك انتى
بس ماكانش عندى الجرأة إنى أقولك فى الأول
وخفت لا تزعلى بعد كده
والله واحشانى
مش عارف اكتب إيه
بس نفسى توصلك رسالة واحدة بس
أنا لسه .. بحبك
ياسمين
انت اغلى حاجة بالنسبالى
انت كل حاجة أساسا
أنا عارف إنك زعلانه
بس أقسم بالله اللى حصل كان غصب عنى
ماكنتش أتوقع إن غلطة واحدة صغيرة كده
افضل اتحاسب عليها العمر دا كله
حرام كده فعلا
انا على استعداد اخسر كل حاجة بس اعرف طريقك
انا على استعداد اكتب عنوانى هنا بكل التفاصيل
بس اعرف انك بتدخلى واحد من الناس
أنا متأكد إنك بتدخلى هنا
وأرجوك سيبى تعليق
أى حاجة بسيطة تأكد ليا انك سامعانى
اى حاجة تأكدلى إنك حاسسة بيا
والله لسة بحبك
وهافضل أحبك
عايز أعرف بقى انتى لسه فاكرانى ولا لأ
يا ترى .. بتفكرا فيا 1/4 ما بافكر فيكى ؟؟
انتى فين
والله رقمى اتغير غصب عنى ... والله التليفون بتاعى ضاع
وماحدش يقدر يرجعلى الخط بتاعه غيرك .. العقد بإسمك
طب بصى
أنا رقمى الجديد
0111658730
وانا متأكد إنك بتدخلى هنا
ارجوك اتصلى بيا
ابعتيلى رسالة لو حتى مش من تليفونك
تعرفى
أنا باقلب فى المدونات اللى فى العالم كلها .. عشان اشوف مدونتك؟؟
الجوجل بيقولى ارحمنى
وانا باقولك .. تبقى صعبه عليا قوى .. لو عرفت إنك بتدخلى مدونتى وماقلتليش
انا غيرت النيك نيم بتاعى عشان اظهر إسمى الحقيقى
يمكن تكونى ماعرفتيش إنى غازى
والله واحشانى
ووالله بحبك
ووالله بحبك
ياسمين
لو مش متأكده لحد دلوقتى إنى غازى اللى تعرفيه
فالقصيدة دى تأكد
:::::::::::::::::::
.. لحظة العشق
.. يتملكنا الوجوم
.. وتهوى على هامتينا
.. سياط الكرى
.. وتلال الغيوم
:: :: :: ::
لحظة العشق
.. أكشف عن وطنى المستباح
.. يضاجعه الغرباء .. بليل الجراح
.. أحاور نفسى .. لألقى على ما لقيت جوابا
.. أقاتل نفسى
ولكن
لم يأت بعد الصباح
.. وتاهت بليلى كل النجوم
:: :: :: ::
لحظة العشق
.. أكشف كل الحقائق
.. أعرف ماذا حدث
لصوت السكون
وأعرف ماذا ورا الستائر
ماذا تخبىء تلك التوابيت فى القلب
.. ماذا يدور
.. خلف أودية الموت
.. وخلف سواد العيون
:: :: :: ::
لحظة العشق
يظهر وجه الوجود
.. يصارع كل وجوه العدم
.. يقاتل بالموت .. بالروح .. بالحب .. بالدم
.. ويسقط .. بين الوجوه صريعا
.. لتبنى على قلبه آلاف السدود
.. بعد أن تشنقه الجروح
وتسرق منه صدى روحه
( ذبذبات الألم )
:: :: :: ::
لحظة العشق
أشعر أنك دنيا قتيلة
.. بلهجة خوف ذليلة
تظلبين الأمان .. وتستشعرين الخطيئة
.. على نبض ما فات من لحظات جميلة
:: :: :: ::
( ياسَمين )
أنت لحظة عشقى
ولحظة زورى .. وصدقى
ولحظة .. حقى
وانت كلامى
وصوتى
وصمتى
وعمقى
....
أعتقد بقى إنك بعد دى .. إتأكدتى أنا مين
وحشتينى
وحشتينى أوى أوى أوى أوى أوى
4 تعليقات:
في ايه يا غازي
يلعن ابو الحب اللي في الواحد كده
انا والله اتعمل في اللي ما اتعملش في حد
انا كنت في يوم من الايام كورة بيتعلب بيها
انا والله تضايقت جدا لما قريت البوست
بس والله لو هي شافته ومالانتش تبقى سوري يعني حجر زي اللي عرفتها قبل كده
تخيل بقى لما كورة تشوطها بحجر دي الكورة ممكن تنط في وشك وتقتلك
انا بقى الحمد لله وبعون الله استحملت
وانت كمان لازم تستحمل
انا اللي عرفته نانك بتشتغل شغل جامد ودورات وكده اكيد كل ده حا ينسيك
في الحقيقة ياجماعة انا كنت معدي جنب البلوج بالصدفة وقريت الموضوع وقريت رد السقا وانا عايز ارد علي الاتنين ، انا كمان مريت بتجربة مشابهة من حوالي اكتر من سنة ، انا ياجماعة اشتغلت في السنة دي شغل كان بيخليني اطبق باليوم والاتنين وساعات بالاسبوع ومع ذلك مفيش ساعة عدت الا وفكرت فيها ، لو انت بتحب بجد ياغازي ومؤمن باللي جواك كمل ، بس متقفش ، فعلا الدنيا مش حتقف وانت كمان متقفش ، لأ كمل حياتك بس قلبك هو اللي حيبقي واقف ومين عارف مش ممكن يتحرك؟؟
دي حاجة في علم الله عز وجل ، الحب شئ جميل جدا بس مينفعش نتكسر قدامه ، مينفعش خالص ياصاحبي.
ايه يا غازى قطعت قلبي يا اخى
هو حصل ايه لده كله يعنى ؟
وياترى ايه هى الغلطة الصغننة اللى بهدلت الدنيا كدا رأسا على عقب
بص
هى لو بتحبك هتغفر لك كل شىء
لو مش بتحبك دى حاجه تانية بقا ايا كانت غلطتك
عموما ياريت تاخد قرار حاسم فى الموضوع ده
يعنى هفكر فيها والاقيها
او هحاول انسى
واللى تقرره حاول تنفذه بجدية علشان تخلص
مش عارف بيتها كمان ؟!
وعموما ربنا يوفقك و يخلصك من المشكلة دى
والله العظيم انت صعبان عليا ياغازي بجد انا لو اعرف مكان ياسمين دي لكنت رحتلها وادتها كلمتين كده في العضل عشلن تحس بيك وربنا معاك ومتوقفش الدنيا كلها عشان الموضوع ده واشتغل ربنا يعينك .....زز وعلي فكره كنت عيزه اسالك انت منين ؟ من دمياط عشان راس البر يعني
ربنا معاك
تحياتي
بنوته
إرسال تعليق